Informations sur la planète

الإحتباس الحراري بش يكون عندو آثار سلبية أكبر و أسرع على البلدان الفقيرة و إلي في الحقيقة متتسببش في إنبعاثات co2 كبيرة. حسب دراسة لمعهد ماكس بلانك في ألمانيا، منطقة الشرق الأوسط و شمال إفريقيا ينجمو يتآثرو بشكل كبير مع نهاية القرن لدرجة إنو بعض المناطق بش تكون غير قابلة للعيش خاطر الأيام إلي تجي فيهم سخانة كبيرة بش يكثرو ياسر. Climate-exodus expected in the Middle East and North Africa

في حين البلدان الأوروبية إلي تنتج كميات مهولة من
co2 بش يجيوها آثار الإحتباس الحراري بعدنا و موش بش يأثر بشكل كارثي كيفنا.
Clear signs of global warming will hit poorer countries first

المشكلة الكبيرة توا إنو البلدان المتسببة في الإحتباس الحراري كيما ألمانيا ميزالت تستعمل في برشا فحم حجري و غاز طبيعي بش تنتج كهرباء، الطاقات المتجددة ميزالت تتكلف برشا و مهاش قادرة توفر طاقة بصفة منتظمة. وحتى كان نفترضو إنو الكهرباء في العالم تولي 100% من الطاقات المتجدة، يقعد فما إشكال متع صناعات كيميائية كيما الأمونياك و إلي لازمو درجة حرارة كبيرة قريبة ل700 درجة مائوية بش المعادلة الكيميائية متع صنعانو تخدم، درجة الحرارة هاكي منجمو نوصلولها إلا بحرقان الغاز الطبيعي، الصناعات هكي تمثل في أمريكا مثلا قرابة 23% من إحتياجات الطاقة معناها بش تتسبب في برشا co2.

أحسن حل حسب رأيي هوا إستعمال الطاقة النووية لإنتاج الطاقة و غلق كل المفاعلات متع الفحم الحجري (حكاية مستحيل تصير و للأسف بلدان متقدمة تعمل في العكس). الطاقة النووية عندها أحسن rendement و موجودة ديمة و قادرة توفر كميات كبيرة برشا من الطاقة، تتسبب في أقل co2 حتى من الطاقة الشمسية، و التصاميم الجدد قادرين يوفرو درجات حرارة عالية نجمو حتى نستعملوهم لصناعة الأمونياك. المشكلة لوبيات الطاقة النووية ضعاف ياسر و الخوف منها منتشر بصفة كبيرة حتى في البلدان المتقدمة و إلي تنتظر إنو سكانها يستعملو مخاخهم موش العاطفة. يكفي إنو إشعاعات حادثة فوكوشيما مقتلت حتى إنسان و حد ماهو بش يموت من الإشعاعات هكي، و الناس إلي كانت عايشة غادي تنجم ترجع.

طاقة نووية: مفاعلات راديكالية

مفاعلات الفحم الحجري تتسبب في مقتل الملايين حول العالم بسبب تلوث الهواء وزيد تتسبب في زيادة كميات radon في الهواء (غاز noble معناها ميتفاعلش مع الغازات الأخرى و زيد مشع، معناها كي يقع إستنشاقو يقعد في الرئة و يعمل إشعاعات جزيئات ألفا و بالتالي يتسبب ببرشا حالات متع سرطان الرئة). مناجم الفحم الحجري تتسبب زادة في برشا يورانيوم كان موجود تحت الأرض يطلع لسطح الأرض.

خلاصة الأمر معادش فما أمل. كان فما أمل كان وقع إستعمال الطاقة النووية من الستينات آما الناس تبعو العاطفة و كانو خايفين من خطر الإشعاعات الصغير عادا غطصو في خطر الإحتباس الحراري إلي ينجم يمثل تهديد كبير لبرشا مناطق في العالم. هارب من القطرة جاء تحت الميزاب.